ديوان الشاعر حامد زيد((..................

في هالموضوع حبيت اسوي ديوان لشاعر حامد زيد

ما يبوح به من شعر رائع وذق جميل

ونترككم مع القصايد

اربع خنـــاجـــر

-------------------------------------------------------------------------------

مشكله لا جات حاجتك بيديـن البخيـل
مايفكـك ليـن تدفـع كثـر مايدفـعـه

ومشكله لا صرت مطعون بكفوف الدخيل
في ظهرك اربع خناجر وبالصدر اربعـه

ومشكله لا ضاق بالوقت رجـالً ثقيـل
يطلب احبابـه وعيـا زمانـه ينفعـه

ليت ربي مايحاسب خليـلً مـن خليـل
دام مال الحظ فزعـه وللوجـه اقنعـه

ودام مال العذل تالي ومابالحيـل حيـل
الغـلا سمـاً نذوقـه ومـرً نجـرعـه

نحتري فيه القا والحصيل هو الحصيـل
مثل حلمـاً ماتحقـق وعيـت اقطعـه

كني اللي حط بشفاه من جمـر المليـل
لا قـدر يرميـه للنـاس وزرا يبلعـه

والظروف اللي حدتني لنيـران وفتيـل
عرضت دمع المحاجـر لشـيً يجزعـه

والمدامـع بالغـلا لا تحـال ولا تحيـل
والمشاكل كل ماجـات جـات مجمعـه

اعذلوني عن هوى النفس وعيوني تخيل
في حبيـب ٍ ماتركتـه ولازلـت اتبعـه

مغرم في حب مثله ولا ارضى له بديـل
عيني تشوفه وقلبـي يجـوع ويشبعـه

ذاك كل مازان بالي وطالعـت النخيـل
ماذكـرت الا ثباتـه بوقـت الزعزعـه

ماهو الاقطعة مـن حشـا قلبـاً عليـل
وماني الا قطعـة منـه مخلـوقً معـه

لا جميل شفت قبلـه ولا بعـده جميـل
العذارا رهن رمشه وانا رهـن اصبعـه

والله انه لو طلبني اطلـوع المستحيـل
لا اطلعه مني منـاك يعنـي لا اطلعـه

ماعلي مـن الملامـه وهـرج الهبيـل
مشجع الرجال لا ثـار غيـره مشجعـه

في عيون اللي عشقني ولا جاني هزيل
الله اللي حط عشقـه بقلبـي وزرعـه

لو سكت ينطق له الصم والدنيا تسيـل
وان حكى لو يمشي المزن ياقف يسمعه

سلسبيل من شفاتـه يخالـط سلسبيـل
معمعه بسكات واحلا سكـات بمعمعـه

ماهقيت ان اكثر الليل يمـرح بالجديـل
لين شفته شوف عينـي بكفـه يرفعـه

وان حيت ومابقالي معـه ياكـود ليـل
لا اسهره بأول غروبه وموت بمطلعـه

والله ان العشق جمره وطاحت بالشليـل
وان حصل ماطاعك الوقت بحبابك طعه

من هو اللي علم عداي نكران الجميـل
ومن هو اللي خان خلي وحاول يقنعـه

كل عاذل ردني عنك يالطـرف الكحيـل
ياعسى الله يقلعـه ياعسـى الله يقلعـه

يامعرض قلب الاحباب للـدرب الطويـل
السعه لا بـارك الله بالضيـق السعـه

والله ان الوقت قاسي وانا مانـي ذليـل
واشهد ان الرجل مرات ظنـه يخدعـه

وانتم اتعذلون خفـاق بعيـون العديـل
مارحمتم نار جرحـه وحيـرة مدمعـه

والسوالف ليلها ليـل والحايـل يحيـل
والمشاكل مشكلـه بمشكلـه متجمعـه

مشكله لا خانك الوقت بالحمـل الثقيـل
لو زرعت الزرع هوج العواصف يشلعه

ومشكله لاصار عاذلـك مايبـرد غليـل
لا تـرده طيـب كلمـه ولحـدً يمنعـه

ومشكله لا صرت مطعون بكفوف الدخيل
في ظهرك اربع خناجر وبالصدر اربعـه

ادلعها وولعهــا

--------------------------------------------------------------------------------

بعـد ماقابلتنـي عاتبـوهـا
على شوف الحبايب حاسبوها

خذوها وأبعدوها غصب عني
وعن وجهة طريقي جنّبوهـا

وشالوها عن عيوني غصيبه
عواذل وأغصبوني وأغصبوها

خذوها من يديني شوف عيني
وعن عيني تعدّوا وأحجبوهـا

كلام وصدّقوا بالبنـت كذبـه
وهم اللي مـن أول كذّبوهـا

وهم وشدخلهم في مال بيّـن
لبوهـا والخلايـق طالبوهـا

وفيّـه لاتخـون ولاتعـانـد
جسوره والمواعيد أرعبوهـا

مـلاكٍ كاملـه والكامـل الله
ولكـن العـواذل عذربوهـا

وهي كلما دعتني تشتكي لي
عن اللي سالفتنـا سرّبوهـا

تخاف وتلتفت مع كل كلمـه
تظـن أن العـواذل راقبوهـا

تلفّت من عقب ماهي جريئـه
شجاعه ماتهـاب وهيّبوهـا

وأهدّيها وأنـا حايـر وثايـر
مصيبـه ياعـذابٍ عذبوهـا

وهم كلما خذوها عن طريقي
تراهم صوب قلبـي قرّبوهـا

وأنا ماتعّبـت قلبـي خيانـه
خيانه رتّبوهـا وأحسبوهـا

ولا يعجز خفوقـي لايقابـل
جفا من حاربـوه وحاربوهـا

وأنا لي عزّة ٍ تفرض عليّـه
أخاطب بالجفا من خاطبوهـا

وأكسر لوحة الماضي وأزيله
وأخرّبهـا مثـل ماخرّبوهـا

وأذوّقهم ندم ماصـار فيهـا
وأشرّبهم من اللي شرّبوهـا

وأدلّعهـا وأولّعهـا بنفسـي
وأشرٌّقهـا بعـد ماغرّبوهـا

وأعوّضها عن اللي راح كلـه
وعن ذيـك الليالـي كلّبوهـا

غلاها بالحشـى لازال ثابـت
ولو حتـى بغيـري حبّبوهـا

وغلاي بقلبها مـرّ وتعـدى
غلاهـا لأمهـا ولا لأبوهـا

الاولي والتــالي..

--------------------------------------------------------------------------------

جا نهـار مـا رحمتنـي جيتـه وقدومـه
شفت فيه النـاس واجـد واقفيـن اقبالـي

كنت احسب انها حقيقة والعـرب ملمومـه
وقمت افضفض عن همومي واشتكي غربالي

ويوم زال الحـزن عنـي وانجـلا بغيومـه
واثرني ما غير اسولـف بالخـلا بلحالـي

من عذابي قمـت اعـزي قصـة مرحومـة
ولعـت بيديـن خلـي وانطفـت بهمالـي

قصةٍ لدت عيـون صويحبـي مـن نومـه
يوم شلت المـوت بيـدي وابتلـوا عذالـي

ما رضيت اكسر غلاي وما قـدرت ارومـه
وعاذلي ما صد عني ومـا قـوى منزالـي

إبتليتـه ليـن جتنـي خنجـر مسمـومـة
وابتلانـي ليـن جـاب الاولـى والتالـي

والله انه مـا عذلنـي ليـن شـق هدومـه
ولين خانتنـي عزومـي وانكسـر تمثالـي

والا انا ما كنت ابين لا أمطـرت ديمومـة
بالمدامع مـن فـراق المخلصيـن امثالـي

كنـت اوقـف واتذكـر نفخـة اليشمومـة
واذكر اني كنت غالي فـي عيـون الغالـي

واحـد كانـت نسايـم سيرتـه بسمومـه
وكان كل ما شاف ظلمي بالهـوى يلجالـي

ذاك والله كل ما أرسل في حشاي سهومـه
انتهـى ليـل السكينـة وأبتـدا زالـزالـي

ووالله اني كل ما اسمع سيرتـه وعلومـه
قمت اشوف الموت الاحمر واقـف بظلالـي

واشهد اني كل ما اسهى وافتكـر برسومـه
وما وعيت الا وانا ارمي غترتـي وعقالـي

ليـت ربـي يحتميـه ويحرسـه ويدومـه
يومه اقرب من عروقي للجسـد بوصالـي

وليتني لما عرفتـه مـا عرفـت خصومـه
وما وقعت بظلـم نـاس ماوراهـم والـي

العـذول اللـي حرمنـي حاجـة مقسومـة
ليـه يحرمنـي قهوتي(والـدلال دلالـي)؟

وليه يسأل في غرامي وان بغيت اسومـه؟
دام صار الجيب جيبـي والريـال اريالـي

والله ان العشـق شـي يستحـق القومـة
واشهد ان عيون خلـي تستحـق افعالـي

يكفـي انـه لا نظرلـي نظـرة محشومـة
يرتجف كفي ويوقـع مـن يـدي فنجالـي

وان لمحت بطرف عينـه دمعـة مكتومـة
جيت كلـي مـن عذابـي عالـي متعالـي

وان تبوسم لي بعينـه والشفـا مضمومـة
والله ان مدري وش اللـي بعدهـا يجرالـي

ليت يومي قبـل يومـه أو معـاه بيومـه
وليت حاله غيـر حالـي دام هـذا حالـي

إن غفيت الليـل جتنـي بالمنـام حلومـه
وان صحيت الصبح ناسي سيرته يطرالـي

والله ليبطـي وعينـي تسهـره وتقـومـه
والله ليبطـي عذولـي مـا يفـك حبالـي

دامني لا زلـت احبـه واعشقـه بهمومـه
بذكره مـع كـل خطـوة حللـت ترحالـي

بذكره مـع كـل ليلـة مظلمـة مشؤومـة
نزلتنـي فـي حشـاه ورفعـت منـزالـي

وبذكره مع كـل دمعـة نوخـت بكمومـه
وعلمتني بان قـدري فـي غرامـه عالـي

وبذكره مع كـل نظـره بائسـة مظلومـة
حسستني بانه اخـر مـن نـوى يصفالـي

وبذكره كا ما نسيتـه وان ذكـرت سلومـه
قمت اشوف الناس واجـد واقفيـن قبالـي

وان حسبت انها حقيقه والعـرب ملمومـة
ما تحكمت بسكوتـي ليـن طـال جدالـي

ويوم زال الحـزن عنـي وانجـلا بغيومـه
واثرني لا زلت اسولـف بالخـلا بالحالـي

الاسطـــورة

--------------------------------------------------------------------------------

ماتقبلـت الفـراق مـا ليـدي فيـه حيـلـه
آه لو ان الظـروف المقبلـه تكشـف قدرهـا

لو يعرف الشخص منّا وش مع الغيب ابيجي له
كان جنبنا المشاكل من قبـل يوقـع ضررهـا

ما هقيت الليله اللـي جابـت الفرقـا طويلـه
لين صارت ليلة امس بعيني اطول من شهرها

والعذاب اللي يذوب بعين مـن يفقـد خليلـه
عندي اكبر من عذاب العين لو تفقـد نظرهـا

والحبيب اللي صـدوده مثـل مداتـه جزيلـه
صد عني واعرفه لو صد عن حاجـه هجرهـا

كن روحي يوم حست في جفاه وصعـب نيلـه
بشرتنـي بالضيـاع وشـدة العـزم لسفرهـا

ما رحمها مـن هـلاك ومـا تقبّلهـا دخيلـه
تحتضر قدام عينه ليـن ماتـت مـن قهرهـا

عاد ليت اللي ذبحها وارهب المـوت بوسيلـه
ما دفن وجه الضحيـه والسكاكيـن بنحرهـا

ليت قلبه يـوم سـوى فعلتـه كمّـل جميلـه
لو غسلها من عروقه وبكفـن صـدره قبرهـا

من حفر بضلوع قلبـه حفـرةٍ تكفـي قتيلـه
ليه ما يدفن قتيله بالضلـوع اللـي حفرهـا؟

اشتكيتـه للرفـوف وللبـراويـز الهزيـلـه
وانذعرت من النياح اللي سمعته في صورهـا

رحت اسولف للجبال الصم عن قصـة رحيلـه
ما تركت متونها الا ينحـت الدمـع بصخرهـا

واحدٍ حقق جماله كذب اساطيـر الـف ليلـه
يسكن السبع البحور ويحبس الحـور بدررهـا

الـدروب بكبرياهـا ترتجـف تحتـه ذليـلـه
والورود اللي تقبّـل خطوتـه تنبـت بأثرهـا

والغصون اليا بغاهـا تنثنـي له.تنثنـي لـه
والفياض ان حب ينثر عطرها يلمـس زهرهـا

لو يصوّت للغديـر المنجـرف جفـف سبيلـه
وان تبسّم للجبـال الصامتـه نطّـق حجرهـا

كل حاجه تستوي له. لي بغاهـا تستـوي لـه
بالنظر واستغفر الله لو بقول : انـه سحرهـا

ذاك لو بـس يتمنـا فاكهـة شجـرة ضليلـه
بس يفتح راحت ايده ويتساقـط لـه ثمرهـا !

كن ربي سخـر لـه المعجـزات المستحيلـه
واصبح اسطوره وكل الالسنـه تنقـل خبرهـا

هان محجر دمع عيني ليـن جفّـف سلسبيلـه
والتفت لأخيـر دمعـه قبّلـت يـده ونثرهـا

دمعةٍ كن بشقاها يـوم طاحـت فـي شليلـه
جادلٍ جات بـدويٍ تطلـب الستـر وسترهـا

له علي انه ليا من طاح مـن عينـي تشيلـه
ولي عليـه انـه يرجّـع لابتساماتـي ثغرهـا

لو طعوني بالسكاكيـن بيـده تشفـي غليلـه
لاشتريها من عذابـي وادفـع بدمـي مهرهـا

واطلبه ينهال فيني طعن ليـن يطيـح حيلـه
بس لا يترك عيوني تنحـرم نعمـة بصرهـا

له بعيني مثل ما للطهـر بالنفـس الاصيلـه
تقطع يدين الردا لو مس شعره مـن شعرهـا

مابغيتـه غيـر دربٍ شتّـت اقـدام الدليـلـه
مزنةٍ ما بللتنـي واستحيـت اطلـب مطرهـا

والعطايا مـن يديـن الخلـق للطالـب قليلـه
والوهايب مـن يـد الله للعبـاد اجـل وأرهـا

وان نسيت اني زرعت العشق وحظوظي بخيله
ما نسيت ان العطايا تستحـق اللـي شكرهـا

صعب تلقى شخص وافي يجزي الطيب بمثيلـه
والعرب كد قالت ان : الناس ما تترك قشرهـا

الثـــــريـــــا

--------------------------------------------------------------------------------

ليـه تطعنـي وانـا ميـت بليـا
ماكفاك الي حصلّـي قبـل ساعـه

كن بيـن همومـي وبينـك حميـا
جيتكم واحـد وجيتونـي جماعـه

انت منـا والمصايـب مـن هنيـا
كلكم ضدي ترى ماهـي شجاعـه

ما ابشع من جروح طعنات القفيـا
غير سكيـنٍ تصيـب بهالبشاعـه

لاتتـوب ولاتــذوب ولا تـريـا
جرحها جرح وفظاعتهـا فظاعـه

ترتوي من فيـض دمـي والتفيـا
وصار قلبي مثل اخوها بالرضاعـه

وانت ليل لـو ضويتـه مايضيّـا
ضعت فيه وشفت نفسي في ضياعه

اتهيـا ويـن مـا اشوفـه تهيـا
وارسي بمرساه وشراعي شراعـه

مـن عرفتـه والمحيـا بالمحيـا
ومايروح الا ذراعي فـي ذراعـه

ان رضيت ارضيه وان عييت عيـا
وان طلبني قلت له سمع وطاعـه

ما عشقت من النجوم إلا ((الثريا))
وماملكت من الكنـوز إلا القناعـه

وانت وجيوش المـوادع والجفيـا
كيف اوقف ضدكم وانتـم جماعـه

لوبجيكـم بالشجاعـه والحمـيـا
البلا ان الكثـره تغلـب الشجاعـه

التمــثال

--------------------------------------------------------------------------------

عفا الله عن خطا غدر الخناجر والضلوع ابطـال
بسامح واتركـك تحـت الظـلام الحالـك لحالـك

دخيلك وفر دموعـك تـرى هـدر الدمـوع اذلال
وترى ما فيه أحد يصبر مثـل صبـري بغربالـك

انا عيب علي أنقـض كلامـي والرجـال افعـال
واذا قلت اقطـع احبالـك ترانـي بقطـع حبالـك

عشان اكسب هدب عينك تجرعت العذاب اشكـال
وليتـك تـرأف بحالـي علشـان ارأف بحـالـك

مسوي في حياتـي شـي مـا يذكـر ولا ينقـال
حشا حتى العدو وهو العدو مـا يعمـل اعمالـك

تمسيني على الهـم وتصبحنـي علـى الغربـال
تقلطنـي فناجيلـك وتقـصـر عـنـي دلالــك

تحملت التعب لجلـك وانـا حملـي يهـد جبـال
رحلت من العذاب ومـا وقفـت الا علـى جالـك

علامك كل ما جيـك متواضـع جيتنـي تختـال؟
معاك اليا متي بصبر وصبـري معـك يحلالـك؟

مثل ما اقبلت لعيونـك لـزوم تلـد لـي باقبـال
ومثل ما قد حشمتك حس واحشم قلبي اشوى لـك

أنا محـدن بجابرنـي أسايـر معـك هالمنـوال
ترى لاني تبيـع لـك ولا نـي باصغـر عيالـك

أنا جيت اعشقك نبض ومشاعر ما اعشقك (تمثال)
أنا جيت اسكنك واحياك وابقى فيـك وابقـى لـك

أنا جيت بظما عاشق تعب يطـرد سـراب الـلال
أنا جيت استفز رضاك مـن فرقـاك والجـا لـك

أنا ما همت بك عاقل أنا كنـت اعشقـك بخبـال
أنا ما كنت احبك حي أنـا كنـت اعشقـك هالـك

تخيل من كثر ما اخـاف تلقـى للزعـل مدخـال
أخاف اخطي على طيفك وادوس برجلـي ظلالـك

تبعتك والعـرب تتبـع رعـود البـارق الهمـال
وانا شفت المطر يتبعـك فـي حلـك وترحالـك

كأن اللي خلق حسنك خلقني مع جسـدك ظـلال
وصرت اقرب جسد يمشي معك باقفـاك واقبالـك

أبـي قلبـك يحـس انـه فقـد بمحبتـه رجـال
ملكته من هدب عين وخسـرت رضـاه باهمالـك

صحيح ان الفراق اقسى ولكـن الوصـال محـال
أنا صعبن علي أرضي غرورك واضعـف قبالـك

بعد مـا حققـت عينـي فبعـدك للرقـاد امـال
أعود للسهر؟ -- يا خـوي فـال الله ولا فالـك!

ببدل نظرتك فيني واجـي لـك كـل يـوم بحـال
بكون اقرب مـن ثيابـك عليـك ولا تهيـا لـك

بلمك وانثرك واجمعك وارجـع وانثـرك باهمـال
بخونك وازعلك وارضيك وازعل منك وارضى لـك

أبرسم بالثرى وجهك وابدفـن صورتـك برمـال
أبشكي للعـرب فرقـاك واضحـك عنـد عذالـك

أبهديك الوصال فراق واهديـك الفـراق وصـال
بسوي مثل ما شوفـك تسـوي وافعـل افعالـك

عشان تعرف من فينا الزعول ومن وسيـع البـال
أبيـك تـذوق فنجالـي وانـا بـذوق فنجـالـك

نصيحة واحتفظ فيها قصر معك الزمـن أو طـال
أبي تسمع كلامـي زيـن وتحطـه علـى بالـك

اذا حبك هبال اطفال لـك عنـدي هبـال اطفـال
ولا --- وابشر بعد بهبال حب ٍ ما هـو بهبالـك

واذا قصدك تهين اسمي عشـان تشمـت العـذال
ترى لا انته ولا غيرك --- ولا عشرة من اشكالك

الحلـــــم

--------------------------------------------------------------------------------

بوقـت مـن البطا،وبليـل تتـراقـص شياطيـنـه
بعد شفت الضيا ينـزع مـن ثيـاب المسـا ثلثيـن

تحايلـت المنـام اللـي مـثـل بيـتـك تمريـنـه
وانا اللي من تفارقنا وأنـا ماغمضـت لـي عيـن

غريبـة كـل حلـم يـمـر بـرقـادي تزوريـنـه
والاغرب كيف أحلم الحلم،وارجع واحلمـه بعديـن؟

قبـل يومين،شفتـك بالمنام..وقمـت مـن حينـه!
ونمت أمس،ورجع نفس المنام اللـي قبـل يوميـن

أنا اللي قبـل اسافـر شلـت قلبـي مـن شرايينـه
تركته في يـدك مثـل الأمانـه ،واحفظيهـا زيـن

تـرى حفـظ الأمانـه دين..مجـبـورة ترديـنـه
أجل ، مافيه أحد كد قال لك(حفـظ الأمانـة ديـن)؟!

مـرد المقفـي بيلفـي.. ويستـوفـي ،وتوفيـنـه
بعـد ليلـه ،ثلاثه،أربعه،عشره،شهـر، شهـريـن

إذا انتـي ،ماانتـي بقـد الكـلام اللـي تقوليـنـه
حرام..استامنك حاجـة،وإذا جيـت اطلبـك تنسيـن

تخونين،وتبيـن أرضى.!وأحـد يرضـى تخونينـه!
أنا لاجيت أخونـك، مـع حبيبـة ثانيه،ترضيـن.؟

من أول مارجعت من السفـر ماشفـت لـك بينـه؟
وأنا اللي كنت أحسبك قبل ادوس ارض المطار..تجين

تكونين أنتي أول شخـص عينـي تحتضـن عينـه
وكنـت أتخيلـك مـن زود فرحـة رجعتي..تبكيـن

وأشـوف بدمعتـك حكيك..وأعرفـه قبـل تحكينـه
واجيب أحلى مـن اللـي بتحكينه،وأتركـك تحكيـن

تقولين:الـوطـن نـور..وأقـول بنورمضـويـنـه
تقولـي لي:غديـت أحلى،وأقول:عيونـك الحلويـن

كــلام نــام بشفاهك..وخفـتـي لاتصحـيـنـه
ذخرتيـه لغـرام للـي ينام...ويـتـرك تصحـيـن

تغانمـتـي غيابي..لـيـن رجحـتـي موازيـنـه
تعلم مـن يـدك لمـس الكفـوف وعلمـك تجفيـن

وليتـك لاقـيـه بــه شي..فيـنـي ماتلاقيـنـه!
مهـو بغرور..لكـن خابـرك مالـك أمـل تلقـيـن

تغافلـك بغـلا..والإ الحـلا مهـو بمـن زيـنـه!!
تزينه الصور ..بس الصحيح ابـن الحـلال زويـن

وأنـا مانـي بنقـاص عنـه يـوم أنـك تبديـنـه
نصيبي..هو نصيبي لـو يسددهـا مـن الصوبيـن

قنـوع بمظهـري ،والـسـم مايـذبـح ثعابيـنـه
على قول المثـل مانـي حلو..لكنـي مانـي شيـن

إذا أهـداك الزهـر مره،فأنـا اهديـتـك بساتيـنـه
وإذا ألهاك بفرح ليله، فانـا تهـت لبكـاك سنيـن

وإذا استضعفـتـك أملاكه...وشتـتـك ملايـيـنـه
أنا حتـى فتـات الخبـزة أقسمهـا معـك نصيـن

طموحـي ،بـس أجـي وأظفـر بشـي تستحقينـه
تدينـتـه ،تسلفته،سرقـتـه ،مومـهـم منـيـن؟

كأنـي مـن كثـر ماارضـى بكـل اللـي تمنينـه
لـو انـك تطلبيـن الله ..يعنينـي، بقـول آمـيـن

أنا ماالعب علـى الحبلين،وقـت الطيـش وسنينـه
تبين الحين يوم أني كبرت العـب علـى الحبليـن؟

ترى عنـد البـدو بالـذات عيـب اللـي تسوينـه
حـلاتـك لاعشقتي..تعشقيـنـي لـيـوم الـديـن

غـرامٍ نسكـن ضلوعه..حشيمـه مـن مجانيـنـه
جفا،يجمـع معزتنا...ولاعـشـق يــذل أثنـيـن

كثـار الـلـي تحـدونـي وقالـولـي :تحبيـنـه
امانـه ...لاتخلينـي صغـيـر بعينـهـم تكفـيـن

لانــي كـــل ماقالوا(تخون)..اقول:مسكـيـنـه
عليـك الله وأمانه..علميهـم منـهـو المسكـيـن

أنـا خايـف لياطـاح الجمـل تكـثـر سكاكيـنـه
وأنـا ماعـاد بضلوعـي مكـان لطعنـة السكيـن

مثـل ماقالواالمكتـوب واضـح مــن عناويـنـه
لو ارحل منك للغربه بسافـر مـن ظلامـك ويـن؟

كفايه..كـل حـلـم يـمـر بـرقـادي تزوريـنـه
كفاية..مـن تفارقنا..وأنـا ماغمضـت لـي عيـن

قبل يوميـن شفتـك بالمنـام وقمـت مـن حينـه
ونمت أمس،ورجع نفس المنام اللـي قبـل يوميـن

الجريــــمـــة

--------------------------------------------------------------------------------

يوم ثارت في جنون مـن جنـون الجاهليـه
عاتبتني لين شبـت فـي شرايينـي لهبهـا

واستفزتنـي وفـزت وزعلـت منـي عليـه
وستضاقت من كلامي يـوم زعلنـي عتبهـا

من بعدها ما بقى لـي فـي محانيهـا بقيـه
اسدلت دمع المحاجر للبكـا ورخـت هدبهـا

والله اني مانويـت ابـدي معاهـا بالخطيـه
بس هي اللي تعدت حدهـا لحظـة غضبهـا

والله اني كنت اكابـر بالعتـب بحسـن نيـه
بس ابدري هو صحيح اني الوحيد اللي عجبها

يمكن اني كنت قاسي بالعتب معهـا شويـة
كثر ما كانت تمنى راحتـي واعشـق تعبهـا

جرحتنـي بالكـلام وكبـرت حيـل القضيـة
واخسرت بي كل عرق من شراييني كسبهـا

ولا هـي ماكـان فيهـا للمـوادع مقدريـة
والجفا كانت تعافه بـس مـدري وش قلبهـا

ليتني مارحت اقيـاس قيمتـي عنـد بدويـة
رجعت لـي كـل عـرق حبهـا ولا نهبهـا

وعلمتني كيف بالجفا وانتصر وابقى ضحيـه
وعلمتني كيف قلبي لو غلبهـا مـا غلبهـا

وعلمتني يـوم صـدت عنفـوان الاجوديـة
ماتلـوح للمقفـي لـو سلبهـا مـا سلبهـا

رابية بين القبايل والعـرب واهـل الحميـة
عاقلـه ماتبـذر إلا نخلـة تعـرف رطبهـا

إن تهادت ذكرتنـي فـي خفـوق العامريـه
وإن تمادت تركب ابليس الرجيـم وماركبهـا

جفنها لا سلهمت به مـا يطليـق السامريـة
تسحبه برضاه عينه وان سهت عينه سحبها

وان حكت تعطي مكانه للحـروف الابجديـة
كـن كلمتهـا تلفـت للكـلام اللـي عقبهـا

والحروف اليـا تعـدت بالشفـاه النرجسيـة
كنها صارت قصيـدة بـس ربـي ماكتبهـا

وش بوصف من حلاها وش بخلـي للبريـة
مابها بالحسن عيـب واكشفتـه الا حجبهـا

شعرها فيه الخوي اللي تبـرى مـن خويـه
والشفا لو تشرب الما واختلط فيهـا شربهـا

كن في ضمة شفاهـا جمرتيـن بنـار حيـه
كل من حس بدفاها وحتـرق صـد وقربهـا

شفتها مثل الجريمـه وابتليـت ابهـا بليـه
غلطة ٍجيت اتحاشى ظلمهـا قلـت ارتكبهـا

كل شي شفـت فيهـا فيـه نبـره جاذبيـه
موهبة من فضل ربي واشهد ان الله وهبهـا

كلـهـا لله بلله فاتـنـه هــا لآدمـيــه
عاجبتني من بداية راسهـا لا سفـل كعبهـا

لـو تبادلنـي شعـوري والهديـة بالهديـة
ماوفت لي لو تبيع ثيابهـا واغلـى ذهبهـا

هملتنـي والقلـوب الجرهـديـة جرهـديـة
وحرقتنـي والمحبـه نارهـا تاكـل حطبهـا

ولا انا ماكنـت اكابـر والليالـي السرمديـة
يمكن ان اللي غصبني للولع فيهـا غصبهـا

ياخوفوقي وادري انك منت في حاجة وصيـة
شف مكاني وانت تدري وين هي يمة عربهـا

رح لها وان كان فيها قلب يطمح في مجيـه
شف طلبها في عروقه وان حصل تمم طلبهـا

وانشده وان قال عنها من هدر دمـي بريـه
قله ان اللي حصلـي بالمحبـة مـن سببهـا

ولو يقول اني تعمدت الخطـا لجـل الأذيـة
قله انـي مـا تحمـل بالعتـب قلـه ادبهـا

ولو يقول اني انا اللي كنت بـادي بالخطيـة
قل هي اللي تعـدت حدهـا لحظـة غضبهـا

السفيـــــنـــه

--------------------------------------------------------------------------------

ضاقت وساع الفيافي والوعد متن السفينـه
للطريق اللي دعاني بعد أمـان الله وأمانـه

لاتنادينـي وصونـي قلبـك الله لايهيـنـه
لايراهن في رجوعي لجل مايخسـر رهانـه

ليه ما أرحل عن غرامك بعد ماذقت الغبينـه
أذكريلي شي واحد يستحـق أقعـد عشانـه

قلب ماحن لوصالي مانـي بحاجـة حنينـه
وأشهد أنـه مايعـزر بالرفيـع الا هوانـه

الهـوى الغـدار حـد الله مابينـي وبينـه
والرجل لاخير فيه إن ماحفظ قدره وصانـه

واحدٍ مثلي اليا من حدتـه عوجـا سنينـه
ماشكى لقرب أبن ادم لوهو أقرب من أخوانه

يوم قلبي ماعصـاك وماقدرتـي تذبحينـه
ليه خنتي فيه وأنتي معه من نفس الديانـه

كان ذبحي بيدك أرحملي من اللـي تفعلينـه
وأن طلبتـك تذبحينـي ماذبحتينـي لعانـه

كل جرحٍ من جروحي تذكرينـه .. تنكرينـه
كن مالك في نزيفه (يـد) خانـت بالأمانـه

ينزف الخافق تواضع لين لطختـي جبينـه
والا أنا ماكنت أبيها توصـل لحـد الأهانـه

قلت من باب الميانـه صاحبـك وتعذبينـه
لعنبوك إرخي معاي أشوي ماصارت ميانـه

طعت عقلك يوم قيل إن العقل للبنـت زينـه
لكن الشرهه علي اللي كنت أحسب إنك تكانه

من بعد ماكنتي أنتي في حشاي أغلى سجينه
بوعدك بطلق سراحك وأتهمينـي بالأدانـه

وين رايـح..؟ لأي دربٍ مايرجـع للمدينـه
ليه رايح..؟ لان قلبك ماترك قلبـي وشانـه

كيف أبنسى.؟ ربي اللي ملهم القلب السكينه
مثل ماعانه بقربـك لانـوى فرقـاك عانـه

كان قاسي يجرح أطراف السكاكين السنينـه
مايطيح وبنتٍ مثلـك حبهـا هـزت كيانـه

والا أنا خابر خفوقـي مايمـد الا الثمينـه
وإن بغى يغيض الثريا قعد القمـرى وزانـه

مزعلٍ لجلك هنوفٍ رجـت عقـول رزينـه
وإن تهادت بالطريق الجرهدي تزهر جنانـه

جادلٍ كـن الجمـال قبالهـا كتـف يدينـه
والقمر لو شاورت له ينزح وتقعـد مكانـه

كانت أول من تحكم في فـروع الياسمينـه
وأن تعدتهن تثنـن خيزرانـه .. خيزرانـه

بعتها لجلك وصارت لأصغر أطرافك رهينـه
وألا هي لفتة هدبها تغمـرك ثقـل ورزانـه

والخفوق اللي تغذى مـن معـزة والدينـه
مشكلته إنه تعلق في زمـن ماهـو زمانـه

كل مازادت جراحه وأكتشف غلطة ضنينـه
صدقيه أن قال مابه شخص يستاهل حنانـه

يـوم نـادا يافلانـه مارضيتـي تسمعينـه
ليـن صـوت يافلانـه ,يافلانـه ,يافلانـه

كنت أشوفك زعفرانه تقرض الورد وتدينـه
يمكن أني ماقطفتك بس أشوفـك زعفرانـه

كنت أهاب البعد عنـك وأطلبـك لاتذكرينـه
كان خوف من الفراق وخطوت الفرقا جبانه

وماقتنعت أن الخيانه للرجل تلـوي يمينـه
لين ماربي بعثك وذقت من طعـم الخيانـه

إسمحيلي..مابقـى فينـي مكـانٍ تطعنينـه
وأقبلي من جوف قلبي كل عطفه وأمتنانـه

والله الله في عذابك بتركـك عينـك بعينـه
دلليـه ولايـرده عـن شقـاك إلا لسانـه

والا أنا قررت أسافر وأمتطي ظهر السفينـه
لأن مابه شي واحد يستحق أقعـد عشانـه

الذيــــب والــراعــــي

--------------------------------------------------------------------------------

انا قلبي على الفرقا نوى روحه بدون رجـوع
مثل طير بلا سبق وبـلا وكـر وبـلا راعـي

تهيا للجفا خطوة يبي بقصى الطريـق هجـوع
يدور للعنـا ملجـا طريـق قلـوب جزاعـي

فديتك يالخفوق بحب وجرح وقطرتيـن دمـوع
قبل لايجبـرك خلـك علـى وتلـوي ذراعـي

تعنيت وسبقت الوقت ولا عشت الغرام اسبوع
انا مابي من الدنيـا هبـوب تطـرح شراعـي

لعبت بدوري العاشق وكنت التابـع المتبـوع
وتلعب عيني ادوار الرسالة في يـد الساعـي

رقيت الحب من ساسه الى راسه ولع وخضوع
ورجل ٍتصعد الهامه ورجـل ٍتحتضـن قاعـي

عرفت ان الهوى ظالم مثل ظلم العطش والجوع
وأظني يوم انا عاشق شبيه الغافـي الواعـي

غفيت بعشقي الخاين ووعيت بعمري المدفـوع
واشوف القلب لأيامي غدا ناعي وأنـا ناعـي

وانا بقبل على الفرقا وبضوي للظلام شمـوع
ولا لي بالشقا حاجه ولا بـه للسفـر داعـي

وببدي رحلة الفرقا وبأرحل وانهي الموضـوع
مادام ان العذول اللي لبس ثوبي مـع قناعـي

ابعرف ياترى بعدي من اللي يقطف المـزروع
وانا مالي بهاالدنيا سـوى خلـي ومرباعـي

سطا ذيب على المرعي وسلمت بخافق مفزوع
وفدوة لو يموتـن القطيـع ويسلـم الراعـي

الشعـــــراء

--------------------------------------------------------------------------------

مابقى الا سـود الايـام تحرمـك الرقـاد
كيف الاوهـام اتجـرأ اتسريـك مغبـون

من متى تجزع من الدمع وتخاف البعـاد؟
من متى تقفي بك ظنون وتجيبك ظنـون؟

صرت تاخذ كذبتي صدق، ومزاحي وكـاد
لو بقول اني بخونك تحسب انـي بخـون

ماتعرف ان كل شاعـر يهيـم بكـل واد؟
وانهـم دايـم يقولـون مـالا يفعلـون؟

ابك انا لاقلت ابنسـاك وانكـرت الـوداد
والله انـي مانسيتـك وولاهـم يحزنـون

من جزع من صفعة الشمس يطمع بالبراد
ومن فقد وجهاته الخمس يلقى بك ركـون

اعتبرها هفـوة انسـان او كبـوة جـواد
لو بتسمح فانت غالي ولو تجـرح تمـون

عـد صداتـك مـروة وطعناتـك ضمـاد
خلهن لاراحـن طعـون ولا ردن طعـون

خنجرك يستاهل الطعـن ومتونـي شـداد
ومنك يازين الخناجر ويا بخـت المتـون

ردلي حنيـة المـزح باحسـاس الجمـاد
خلنا واحد يجي صلـب والثانـي حنـون

موت فيني واندفن فيـك بثيـاب الحـداد
وان حييت أموت لرضاك واحيا بك بهـون

مره ارقد بالكفـن وانـت ترقـد بالمهـاد
ومرة ارقد بالمهد وانـت ترقـد بالكفـون

ادري ان شجونك شجون واعنـادك عنـاد
والبلا ان عنادك عناد وشجونـك شجـون

ربك اللي سخرك لـي تقـود ومـا تقـاد
والله الخالـق ولله فـي خلقـه شــؤون

ازرع ضلوعي من رضاك وابشر بالحصاد
لعنبو من جيت ترضيـه وتـرد امحـزون

بس تسوالك بلد ؟ قـول تسوالـك بـلاد
انت كل العالـم بكـون ولحالـك بكـون

مابعـد محبتـك حـب ومـرادك مــراد
غير كونك سيد حشاي تدري من تكـون ؟

نعمتين اختصوا الخلق من جـود الجـواد
كافل الأرزاق مـن حيـث مـالا تعلمـون

البنـون ونعمـة المـال بعيـون العبـاد
زينة الدنيا بـلا شـك فـي كـل العيـون

مثل زينة دنيتي بـس عنـدي شـي زاد
من عرفتك صاروا المال وانـت والبنـون

انتشي بك نشوة التيـه لعنـاق الرشـاد
وافزع الك فزعة القرم لشهـاب ال**ـون

واحصنك تحصين الأرزاق عن درب الفساد
واعشقك عشق المظاليم لفراق السجـون

لو تزيد الشـوق جمـرة تحولنـي رمـاد
لو يزيد العشق شعـرة بوصـل للجنـون

خـل هقواتـك كبيـرة ونظراتـك بعـاد
كانك انت بكبرك تهون من اللي ما يهون ؟

ازعلك وارهن حياتي تحت رحمـة زنـاد
تهبى لا والله الا انـت والمـوت تهبـون

عاد اذا ما ارضاك هرجي ولا اللي قلت فاد
انـنـا لله وانــا الـيـه راجـعــون

وانت باكر بتعـرف علـى نـاس جـداد
والكلام يجيك من كل شكـل وكـل لـون

لاتحسب ان كـل كلمـة بتسمعهـا وكـاد
ولا تصدق هرج شاعر وتخدعك الظنـون

دايم اعرف كـل شاعـر يهيـم بكـل واد
وان هم دايـم يقولـون مـا لا يفعلـون

حتى انا اللي قلت اعشقك وما اطيق البعاد
يمكن اطلع ماعشقتك .. ولا هم يحزنـون

تزعـــلين وتقـعدين

--------------------------------------------------------------------------------

عافت الشمس المدينة وأعلنـت وقـت الـزوال
رغبةٍ للنـوم منهـا مـع عيـون الناعسيـن

أبعدت من يوم شافـت بالسمـا ضـيّ الهـلال
كنّهـا كانـت تهـزّا بالـهـلال وتستهـيـن

كفكفت صبح التلاقـي مـن ورا روس الجبـال
واستخارتني وراحت وابعدت عـن كـل عيـن

وانتي أخطيتـي خطاهـا وانعزلتـي بالوصـال
ولا رحلتي من سكـات ولا وعدتينـي تجيـن

عشت عمري بالمحبـة فـي سبيـل الاحتمـال
وانتي تعيشيـن عمـرك تفرحيـن وتجرحيـن

من غرورك في جمالك مـا عطيتينـي مجـال
وأدري إنـك تفهمينـي لـو بغيتـي تفهميـن

كيف أشوف الشمس تشرق بالسما وانت ظلال ؟
ومن يعيش بوسط غـارٍ للذيـاب الجايعيـن ؟

كنت أحسب الكره زايل والجفـا لـو طـال زال
ولا بديتـي بالغـرام ولا بقـى فينـي حنيـن

أشهد إنـي مـا خطيـت ولا نويـت الانعـزال
وما خدعتك في غرامي ليـن شفتـك تخدعيـن

اصدقي بالوعد مـرة لـي ولـو فيهـا سـؤال
من عرفتك ما أذكر إنـك توعديـن وتصدقيـن

كنت أشوفك من عيونك تأمرين أقـوى الرجـال
والله إني قبل أعرفـك مـا هقيتـك تخضعيـن

كنت أشوفك تبعدين وقلـت مـن بـاب الـدلال
وإن بعدتي عن عيوني قلـت باكـر ترجعيـن

كنتي أكثر في عيوني من عـدد وبـل الخيـال
وين أنا ما الد وجهي كنت أشوفـك تضحكيـن

وإن بغيت أصد عنك من يميـن ومـن شمـال
ما قـوت عينـي تلفّـت لا شمـال ولا يميـن

عاشقٍ والعشق بلوى وأشهد إن الحـال حـال
ولا تركتـي رحمـة الله ولا عرفتـي ترحميـن

وأدري إنك في غرامـي للأسـف نلتـي منـال
افترقنـا فـي دقايـق والسبـب لعنـة لعيـن

حبك أشبه فـي غرامـي بالوصـال الانفصـال
ويلعـب الخفـاق لعبـة كبريـاء الخاضعيـن

بالهوى ماهـي غريبـة نكبـة عيـال الحـلال
ولاني أول من يصون ولا انتي آخر من يهيـن

الصداقة فـي عيـون النـاس منفـى للعـدال
وكـان ردّت للصـراحـة ***ـونـا مذنبـيـن

المحبـة شبـه زالـت والصـداقـة لاتــزال
بس أببقى في عيونك ( حامد ) اللـي تعرفيـن

علّميها يـا قصيـدة واضربـي فينـي مثـال
عرفيهـا بالبـداوة فــي طـبـاع الأولـيـن

علّميهـا كيـف نصنـع صبرنـا والاحتـمـال
علّميهـا كيـف نفلـح بالعمـل دنيـا وديـن

علّميهـا فـي سوالـف حلّـنـا والارتـحـال
علّميهـا كيـف نظهـر جورنـا للجايـريـن

علّميهـا يـا دقايـق ، علّميهـا يـا لـيـال
علّميهـا يـا عصـور وعلّميهـا يـا سنيـن

إن عشقنا مـا بغينـا غيـر عشـقٍ بالحـلال
وإن نوينـا مـا لفينـا كـود نـاس طيبيـن

كامليـنٍ فـي عطـانـا بــس لله الكـمـال
والرجل فينـا غرامـه لـو يعيـن ويستعيـن

ابـدويٍ مـا يقـوده للـردّى شـد الحـبـال
يعسف اليـدّ الشحيحـة للعطـا حتـى تليـن

همنـا فعـل الرجولـة رمزنـا لبـس العقـال
وانتي المكياج كله صار فـي وجهـك سجيـن

عندك المكياج موضـة تحسبيـن إنـه جمـال
صار همك فـي حياتـك تكشخيـن وتطلعيـن

والا أنا قلبي بقـى لـي بالمحبـة راس مـال
والله اللـي مبتلينـي بالـهـوى والله يعـيـن

إن بغيت أعشق أبالقـى كثـر حبّـات الرمـال
لكن انتي لو بغيتـي صعـب مثلـي تعشقيـن

قلت لك كل الصراحة وأختـم أطـراف الجـدال
وإن زعلتي مـن كلامـي تزعليـن وتقعديـن

المبــانـــي

--------------------------------------------------------------------------------

جابك الله من غياب ٍ ضيّـق صـدور المبانـي
قبل لا الوحشه تزعزع بيتك الصلـب وتبيـده

بيتك اللي من رحلـت وكـل جدرانـه تعانـي
ماتحمـل ينتظـر شهريـن وعيونـك بعيـده

الله العالـم لـو إنـك جيـت متأخـر ثوانـي
ماتشوف إلا بقايا مـن حصـاه ومـن حديـده

من عرفتك وأنت تايه من مواني لـي موانـي
وتارك ٍ قلبي مولّع مـن وقيـده فـي وقيـده

ضاعـت سنينـي أحـد بهاليالـي وتحدانـي
وأنت ماتشبع غياب ولاتخـاف مـن النقيـده

ودي أتحمـد لـك الله بالسلامـه , مامدانـي
كل ماتوصل برحلـه ترجـع برحلـه جديـده

دام تدري كل وجـه ٍ غيـر وجـه الله فانـي
ياخي أكسبلك ثواب وخاف ربـك فـي عبيـده

كان فيني عيـب قلي:فينـي العيـب الفلانـي
كان هرجي مزعلـك فـي شـي قلي:لاتعيـده

عيب تصغر في عيوني وأنت برقاب الغوانـي
كيف تستسهل طعوني وأنت خابرني وليـده ؟

لعنبوك أن مت بيدك من يفكك مـن أخوانـي ؟
لحزنوا ربعي على فرقاي شاللـي تستفيـده ؟

أنت منت اللي عشقته أنت أكيد انسـان ثانـي
ليه صرت بهالبرود وبهالاحاسيـس البليـده ؟

وين حبك للزعـل .ويـن العنـاد الأولانـي ؟
وين حنّية زمـان وفرحـة العمـر الرغيـده ؟

وين ذاك اللي اليا أقبـل مايبـات إلا بمأنـي ؟
وين راح اللي اليا أقفى مايـروح ألا فقيـده ؟

واحد ٍ من جابـه الله بـس يامـر ويعصانـي
الوحيد اللي أخافه غصب وأمشي معـه سيـده

(مابغيت أطيـح بيـده) ليـن ماربـي بلانـي
ولا أنا لو هي بكيفي (مابغيـت أطيـح بيـده)

ذاك بس اللـي يامـن جيتـه يلخبـط كيانـي
اللي بنظـره ينشـف دم قلبـي فـي وريـده

قبل أشوفه أجمع اله أحلى القصايد والمعانـي
وأن لقيته ماعرفت أقـول لـي جملـه مفيـده

الف مره قبلـه أعـد القصيـده مـن لسانـي
ولعنبوه أن جيت عنده قمت أخربط بالقصيـده

أمدحه وأنا أدري أنـه لـو تباطانـي نسانـي
أنطحه وانا أعرفه مجنـون وأفكـاره عنيـده

من يسوي بي سواتك يالرهيـف الاسمرانـي ؟
منهو من الناس غيرك غلطته ترفع رصيـده ؟

من يقص(جناح طيرك)وأنت أعز أنسان جاني ؟
ليه أخاف(رماح غيرك)وأنت ضرباتك سديده ؟

ان تبعتك .أتبعك من طيبـي وواسـع بطانـي
ولا أنا لاجيـت أكيـد انسـان عـزالله بكيـده

أقدر أنزع لك ثيابـي وألبـس ثيـاب الأنانـي
وأقدر أطلع من عذابي والعب بـدورك وأجيـده

ومستعد أكسب رهاني لو بغيت أكسب رهانـي
وأخدعك بحساس كاذب وأتحدى مـن يصيـده

أبك أنا لي شفت خلّي حط غيري فـي مكانـي
والله إني لتركه وأن صد لعشـق سيـد سيـده

جيت مابيك تحقرني جيت أبيـك تعـز شانـي
جيت أبي فزعة ظلوعك من مشاعـرك البليـده

خلني داخل (حدودك) وأجبـر بخاطـر زمانـي
أكذب بباقي (وعودك) وأصدق بلحظه سعيـده

أنتشلني من (بـرودك) لـو تولّـع بالمحانـي
عطني أحساس (بوجودك) وأخذ كل اللي تريـد

تكفى واليا قلت :تكفى بيع خلـق الله عشانـي
لاتضيّع من يدينـي فرصـة العمـر الوحيـده

يعلم الله شفت منـك ومـن غيابـك ماكفانـي
كان ماتقـدر تخفـف هـم قلبـي !! لاتزيـده

شف غيابك وش يسوي بالصـدور وبالمبانـي
وأنت تدري كيف كانت صدمت غيابك شديـده

والله أنك لو وصلـت البيـت متأخـر ثوانـي
مالقيت إلا بقايا مـن حصـاه ومـن حديـده

ثــامــن السبـــع العجــايــب

--------------------------------------------------------------------------------

اسمعي والكل منـا لـه هـواه ولـه ميولـه
لاتمسيـن بكلامـك شعـره بـروس القرايـب

ان حكيتي مـا وفيـت وان تحديتـي عجولـه
تحسبين ان كل فعل ٍ تفعلـه يمنـاك صايـب

تحسبين انك خذيتي بالحـش صولـة وجولـة
تحسبين اني ذكرتك مـع نسانيـس الهبايـب

والله انك لو ذبحتـي خافقـي لألقـاك حولـه
عاشقة تشقي بقلب من طريق العشـق هايـب

كم رضيت اسكت عليك من القهر وانتي زعوله
خايف اضحك وستفزك واهجرك واعيش ذايـب

ادعيت انك خجولة وادري ان ما انتي خجولـة
وادري انك تخجلين الشمس من فوق السحايب

مايحببنـي بقلبـك ياالهنـوف الا فضـولـه
ولا ينسيني غرامـك غيـر تكـرار المصايـب

عاشقة جيتـي ورحتـي يالحبيبـه يالعذولـه
لابنيتـي لـي طمـوح ولا تركتيهـا خرايـب

تستبيحيـن القلـوب وتستحقيـن البطـولـة
واستحق اعيش بعدك تايـب وامـوت تايـب

ياكثر ماشال قلبي شـي اكبـر مـن حمولـه
ولا عفيتي عن غلاه ولابخـل لـك بالوهايـب

كنه ارحم من همـال المـزن للزهـر بذبولـه
وانتي اقسى من هجير القيظ وسموم اللهايـب

وانتي ادرى في غلاك بداخلي ش اللي يزولـه
وادخلي علـى الله واحفظـي ذيـك السبايـب

ماخبرت اللحظة اللـي حللـت قربـك تحولـه
ولا هقيت اني بشـدد للجفـا قلـب وركايـب

ولاهقيت انك تحبيـن الزلـل وانتـي جفولـه
ولاهقيتـك تكرهينـي كثـر حبـك للطلايـب

كن قلبي في وصالـك وابـل ٍلحظـة نزولـه
وفي فراقك مثل دمعة تنحدر من عيـن شايـب

كنت ابي وقفت حبيبه تنهض القلـب بخمولـه
طامح بالعشق وانتي عايبـه والحـظ عايـب

كنت ابيع الكون واشتري خافقك وظلال زولـه
كنت اثور اليا وطيتي بالقدم شهـب الترايـب

كنت قصن كـل كفـي غيـر كفـك مايطولـه
كنت قلب ودمعتيـن ودرب وجـروح عطايـب

كنت ابيع العمر كله ورخصه عرضـه وطولـه
للعيون الي هدبهـا ثامـن السبـع العجايـب

بس ابرضي لك غرورك واكسر القلب بذهولـه
وقتها ماكنت افكـر صايـب او كنـت خايـب

والرجل لـو ماتحلـى بالشهامـه والرجولـة
صدقيني صعب يقدر يملـك قلـوب الحبايـب

صدقيني مايوالـف خافـق البنـت بسهولـه
بالهوى يابنت حـواء غيـر طـلاب النشايـب

والسهر والعشق الاول والهوى واللـي ينولـه
شي اقسى من همومك والعنه حاضر وغايـب

والهموم اللي دعتني من بعـد سـن الطفولـة
كلها ( من تحت راس العشق ) ملعون الصلايب

غـرام احبــــــاب

--------------------------------------------------------------------------------

على ذاك الطريق اللي يسمونه غـرام أحبـاب
وطت رجلي على دربه ولاأدري وش نوى فيني

تبعته لآخر دروبه .. ألين أن القمر قـد غـاب
تعـب قلبـي ، ولا تعبـت مسافـاتٍ تودينـي

لقيت الليلة الجردا : هدب ظل وسما واعشـاب
بعـد ذاك الظـلام اللـي يتوهنـي عناوينـي

صدفتك معجبه فيني وياليت..الغرام : اعجـاب
وتراك انتي الهنوف اللـي هقيتـك تستحقينـي

عطيتك عشق من قلبي..وسلمت لغـلاك رقـاب
وغيـرك يحتـرق قلبـه ولا يقـدر يحاكينـي

أنا قبلك صدفت عيون لكن ويش جاب لجـاب؟
ترى كل العيـون اللـي لقتنـي مـا تكفينـي

رماني حظي العاثر عليك وجيـت لـك طـلاب
ولا أنتي اللي عشقتيني ولا انتي اللي عتقتيني

تعالي واعتقي ذاك الخفـوق المولـع المرتـاب
مهب لاجلي ، عشان الله يجازيـك ويجازينـي

تعدي في سما عشقي ولو عشقي خراب أصحاب
وصوني بالهوى نفسك قبل لا انتي تصونينـي

وشيليني على متنك : خفوقٍ بـاريٍ منصـاب
ومن فوق الغرام العذب .. شيلينـي وحطينـي

ولا منك هقيتيني شجـاع ومـا يطيـق يهـاب
أنا لك بالهوى والله مثل مـا انتـي هقيتينـي

أنا ما أمشي ورا غيرك ولو أنه يطـق البـاب
وترى عيبٍ عليّ أطعن..ولو كثـرت سكاكينـي

زهودٍ مـا يطيـق الـدم لا دايـن ولا طـلاب
شجاع وعارفٍ نفسـي وأظـن أنـك تعرفينـي

غيورٍ ماعرفت أضحك مع الغدر ببّرود أعصـاب
أبيع عيونـي الثنتيـن قبـل أنـك تخونينـي

إذا شد الغرام .. اترك خفوقي : بين ناب وناب
لفرقى تكسر ضلوعي .. ولا عشـقٍ يوطّينـي

أنا رجلٍ ولي غيره .. وإذا شفت الهوى كـذاب
تثـور بقلبـي الفزعـه ولا تهـدى شياطينـي

سؤالك لو يزعزع بي كياني ما قبلـت عتـاب
اجي لك وأسالك نفس السؤال اللـي سألتينـي

عن العشق القديم أبواب .. تقفيها كثير أبـواب
بعد ذاك الحبيب اللي خدعنـي وانخـدع فينـي

أبي عشق تحسب له كل نظرات العيون حساب
وابي قلبٍ علي قلبي ، وابى دينٍ علـى دينـي

وابي نظرة عطا توفي ولا تخلف بدون أسبـاب
وابي منك قبل لا نتـي تصدينـي .. تودينـي

وابي دربٍ على العذال صعبٍ ومتعـبٍ وغـلاب
وابي نفس الطريق الصعب يبعدهـم ويدنينـي

ترى لو للقلوب عيون ولدموع العيون أهـداب
حشى ما تنزل الدمعـه لغيـرك لـو تركتينـي

أنا أول من عرف قدرك وأنا توي صغير وشاب
وابي منـك مـا دام أنـك عرفتينـي تحبينـي

ما دام أني لقيتك في طريق أسمه غرام أحبـاب
دخيل الله ، وبعـد الله دخيلـك .. لا تخلينـي

ما دام أن كل من يحيا على وجه التراب تـراب
عسى تنساني الدنيـا مـادام أنتـي ذكرتينـي

رد الســؤال

--------------------------------------------------------------------------------

انتبهت لدمعها بالهـدب والكحـل سـال
لين جفت عينها دمـع والقـاع ارتـوى

وابتدت لحضة جفا ونتهت لحضة وصال
وأنطفى نور السعادة واحسب انه ضوى

ما اكتفيت من الهوى والغرام أربع ليـال
واقفت أيام التلاقي وجـا وقـت النـوى

كنت ابلسى وابتسم والتفت عنها شمـال
لا قويت الصد عنهـا ولا قلبـي قـوى

ما هقيت ان الهوى عذب قلوب الرجـال
لين ضاع القلب مني وتفكيـري سـوى

رحت أدور دفوة الشمس ضيعت الضلال
جيت اطفي شعلة النار والقلـب انكـوى

ماهقيت ان السعادة خيـال فـي خيـال
تروى قلوب الحبايب وقلبـي مـا روى

كنت ابشتال الهوى والهوى ثقل الجبـال
وان تحملت الجبل ما تحملـت الهـوى

كنت ابسلى بالهوى والهوى صعب المنال
ما رضا لي حظي اللي طواني وانطـوى

قلت لا فراحي تعالـي ولا قالـت تعـال
والخفوق ان قلت ابقبل على صدي نوى

الله أكبر لا شرقت شمـس يتلاهـا زوال
كيف ابفرح في صباح مع الليال استوى؟

لاحصل بالحب قسمة ولا جا لي مجـال
غير اشوف معاند الجرح وعناد الـدوى

شبت النيران واقفت وجـاء رد السـؤال
ما تشب النار يا كـود يوصلهـا هـوى

من تحــت لـتحـت

--------------------------------------------------------------------------------

لو تعرف الخطايا كيف كنـت محـروم
كان سود الليالي يوم طحـت سمحـت

لو هموم المفارق مثـل كـل الهمـوم
ماتشوفون عينـي بالدمـوع سبحـت

ولو تحن المشاكل عقب حب الخشـوم
كان حبيت خشـم المشكلـه واستحـت

بين صـدة عزيـز وكبريـاء مهـزوم
عين شحت علـى وعيـنٍ استسمحـت

بس مالله خلقني مـن بكـاي معصـوم
وادري انه المحاجر لو تفيض افضحـت

والله اني على جرحي صبـور وكتـوم
لكن ان الدمـوع ان روحـت روحـت

اعذلتنـي ظروفـي وانهكتنـي عـزوم
والوجيه احزنت لي والقلـوب افرحـت

اشهـد ان الليالـي ماتعـرف السلـوم
قلب جافي لقاه ووجـه صافـي بحـت

راهنتنـي تبلـل بالدمـوع الكـمـوم
ويشهد الله عليهـا راهنـت واربحـت

احرمت نور عيني من غلا ريـم قـوم
بـذرةٍ وارتوتنـي واثمـرت واطرحـت

جـادلٍ دوم ماهـي مثلهـا كـل يـوم
استضاحت غموض وبالغموض اوضحت

دورت بين قلبـي والهـدب درب نـوم
وامرحت وين مـدري المهـم امرحـت

تنحت اسمي بقلبٍ جيت فيـه معـزوم
واسمها بين جلـدي والعظـام انحـت

مثل جفني لعينـي بالنعـاس محكـوم
كل مانمت نامت كل ماصحـى صحـت

ماتعارض كلامي غيـر عنـد اللـزوم
بس لا قمت اسولف واندمجت سرحـت

دايم ازعل عليها بـس قلبـي رحـوم
وهي تموت بعذابي من تحت لي تحـت

مثل وجه العلاقه في ثيـاب الخصـوم
ان تطيبت طابت وان جرحت اجرحـت

خصها الله بوصفٍ من خيـال معـدوم
لا اذان اسمعتبـه ولاعيـون المـحـت

كن ربي خلقهـا مـن بيـاض الغيـوم
ومن كفوف السحابـه بالـورد القحـت

عن سواهـا فرقهـا بالقمـر والنجـوم
وكل عـذرى تباهـا بالجمـال انزحـت

بالحلا هي كوم وباقـي النـاس كـوم
كفـتٍ عادلوهـا بالبشـر وارجـحـت

حسبي الله على اللـي مابغاهـا تـدوم
من بعد كيف كانت شوف كيف اصبحت

لاتحقـق وصـال ولا فـراق محتـوم
خطـةٍ قربتنـي للفـشـل وانجـحـت

لعنة العشق تبقى مثل ضرب السهـوم
لو محى الوقت جرحه صورته ما انمحت

كيف ابنسى وانا اللي من جفاف لسموم
ماحشمت العيـون ولا الدمـوع فلحـت

كانهـا بالحميـا كـل ربعـي قــروم
لو يلدون لاصعاب الظـروف صلحـت

اجزم ان كنت ياقلبي شجـاع وجـزوم
لـد لعيـون بنـتٍ لا التفـت الفحـت

ماتهيـن البخيـل الا يديـن الـخـدوم
دام كـف الخطايـا بالجفـا لـوحـت

نطح الباس باس ونطـح اللـوم لـوم
وان تهدت تهـد وصيـح ان صيحـت

ياتعيـش بمعـزه ياتمـوت محـشـوم
ودك ان الليالـي لافعـلـت امـدحـت

عمر ضعـف الاراده مايسـر الرخـوم
ضربت السيف لوبيدين الشجاع ذبحـت

قــالهــا حــــامــد

--------------------------------------------------------------------------------

تماديتي وأنا مثلـك تماديـت بهجـر وبعـاد
وكـلٍ مثّـل عنـاده خفـوقٍ ثابـتٍ صامـد

وإذا عندك بعادي عيد ترى عندي جفاك أعياد
وعسى طول الجفا مني يليّـن قلبـك الجامـد

أبضحك وأظهر البسمة ولو إن الجروح اجداد
وترى قلب الحريقة ضو ولو وجه الحطب رامد

بكون أكبر من الغلطـة وبعلـن للهوا ميـلاد
إذا كان الخطا منـك مجـرّد ثـورة الخامـد

وإذا كان الجفا منّك مسافـات وغـلا وعنـاد
تراي أكبر من عنادك وقولـي قالهـا حامـد

وش الي يجبر الشــاعــر

--------------------------------------------------------------------------------

انا والليل والعبـرة وجـرح وخاطـر ٍمكسـور
ونفس من هجيـر البعـد والحرمـان مقهـورة
وقلب ظامي لشوفـك ولايـروى ظمـاه بحـور
وعين تحتري لحظة غيـاب الطيـف وحظـوره

ونـار تنطفـي مـره ومـره تشتعـل وتثـور
واقول النار مقدورة وهـي مـا هيـب مقـدورة

حسبت الليـل بغيابـك يمـرن الليـال دهـور
وكني شايـل بقلبـي ليـال الوقـت وشهـوره

تصبرت وتقدرت وبنيت مـن الخيـال قصـور
إليـن ان الجفـا شـد الركايـب وانتهـى دوره

تحريتك على درب القصيد مـن ثـلاث شهـور
وحشا ما مات لك غصن يشف المـاي بجـذوره

تخيرت الغرام وجيـت لا راضـي ولا مجبـور
وجيتي تسبقيـن خطـاك مرضيـه ومجبـوره

وانا ما كان لي رغبه أبين واكشـف المستـور
ولكن الجمـال أكبـر مـن الخفـاق وشعـوره

جمـال وود وعيـون ودلال وكبريـاء شعـور
وفتنة تخـذل عيـون النهـار وينطفـي نـوره

ولك في خافقي صوره تلاشت بين ضـي ونـور
وأخاف اسكت من الفرحة وتنطق باسمك الصورة

عرفتك وانتهت رحلة قسـاوة دربـي المهجـور
والا يا جملـة أيـام الجفـا والصـد مشكـورة

خذتني للجفـا عـزه واخذنـي للعنـاد غـرور
واخاف اكون بعنـادى حبيـب ومـات بغـروره

وإذا كانـت مسافـات الخيانـة للغـرام قبـور
وش اللي يجبر العاشق يخون ويحفـر قبـوره؟

وش اللي يجبر الشاعر يدور للشعـر جمهـور؟
مـدام انتـي محبينـه وعشاقـه وجمـهـوره

يجيني يوم وعطيها

--------------------------------------------------------------------------------

انا ما اخطيت في حقك ولكن الكـلام عتـاب
أعاتـب والعتـب كلمـة تفسرهـا معانيهـا
اعاتب واحسب بهرجي الا مني حكيت حساب
وكلمه يستحي منهـا لسانـي يبتـدى فيهـا
واذا انت من العتب تزعل علينا وابتصك الباب
ترى ما نيب قاصدهـا ولانـي فيـك ناويهـا
ولا ودى على الفرقا وقلبـي داخلـي مرتـاب
اشوف ان الهوى خدعة واشوف القلب راضيها
واشوف ان الهوى فرقا مواليف وعناد احباب
واشوف ان الجفا خطوة ولاني قادر اخطيهـا
وقلبي لو عشق يخلص ولو طالت عليه رقاب
وتشهد له دروب الحب حاضرهـا وماضيهـا
عشقنا والهوى حسرة،مشينا ولاأمـل كـذاب
بدينـا نانبنـي منهـا قليـل مـن بلاويهـا
عرفت الحب من عمري صغير بالغرام وشـاب
وقلبي للحبيب اكبر مـن الدنيـا ومـا فيهـا
صحيح انى نويت ابعد ولكن الهـوى غـلاب
وهي رحلة بديت بها ولا ادري كيف بنهيهـا
تحريتك شروق الشمس وشفتك للشروق غياب
ولا اضنك تبيع العشره اللـي كنـت شاريهـا
بقى لي بالهوى نظرة وتغريبة ودمـع اهـداب
وقصة بترك لسانـك علـى العـذال يرويهـا
واناجي باقي حروفي وبألـف للفـراق كتـاب
قصايـد تملـي اوراقـي ارددهـا واغنيـهـا
واذا مرتني الذكرى وجرحي بالحشا ما طـاب
بتبعدنـي وتدنينـي وببعـدهـا وابدنيـهـا
وانا عيب علي اشكي من الدنيا بدون اسبـاب
مدامي ما خذ منها يجينـي يـوم واعطيهـا

الام

--------------------------------------------------------------------------------

قصيدتـي زاد بعيونـي جمالـهـا
واخذت أنقـي بالمعانـي جزالهـا

واكتب معانيها من الشوق والغـلا
لأمي وأنا اصغر شاعر ٍمن عيالها

كتبتها في غربتـي يـوم رحلتـي
لمـا طرالـي بالسفـر ماطرالهـا

امي وانا بوصف لهـا زود حبهـا
وان ماحكيت لها قصيدي حكالهـا

امي لها بالقلب والجـوف منزلـه
مكانـة ماكـل محبـوب نالـهـا

اقرب من ظلالي وانا وسط غربتي
وانا تراي اقرب لها مـن ظلالهـا

ماشافت اعيوني من الناس غيرها
ولا خلـق رب الخلايـق مثالهـا

اغلا بشر في جملة النـاس كلهـم
واكرم من ايدين المزون وهمالهـا

اتبع رضاها ورتجـي زود قربهـا
واللي طلبته من حياتـي وصالهـا

الصدق مرساها والاشواق بحرهـا
والعطف واحساس الغلا راس مالها

اهيم فيهـا وابتسـم يـوم قلبهـا
يسأل وانا قلبي يجـاوب سؤالهـا

وان اطلبتني شـي فزيـت مندفـع
اموت أنا واحمـل تعبهـا بدالهـا

واصبر على الدنيا والاحزان والتعب
واحمل على متني فطاحل جبالهـا

واسهر اعذب راحة القلب بالشقـا
واعيش اعاني بس يرتـاح بالهـا

تربية ابوي اللي على الطيب بذكرة
اللـي وهبنـي الحيـاه ومجالهـا

نور لي ادروبي وانا طفل مبتـدي
حتى تركني واحـد مـن رجالهـا

الوالدين اولى بالاحسـان لجلهـم
وأولى بتكريـم النفـوس وعدلهـا

اقولهـا وانـا علـى الله متـكـل
والله عليـم بقدرتـي واحتمالهـا

ياكلمة اغلى مـن النـاس كلهـم
ياشمـس بقلبـي بعيـد زوالهـا

يافرحة تملي لي الكـون باكملـه
ياشجـرة تكبـر ويكبـر ظلالهـا

تضحك لي الدنيا ليا شفت زولهـا
مثل السما تزهـا بطلـة هلالهـا

والبعد عنها ياهل العـرف ماقـدره
لاشـك نـاري زايـدة بشتعالهـا

ماعيش ببلاد ولاهيـب بأرضاهـا
ولابي عيوني كان ماهـي قبالهـا

أرض ٍ تدوس امي بالاقدام رملهـا
اموت فيها واندفـن فـي رمالها

هموم بهــموم

--------------------------------------------------------------------------------

من يوم فرقانا الى يومنا اليوم
مافات يوم الا وهي مشغلتنـي

إليا غفيت اشوفها في حلا النوم
واليا صحيت بكل الافكار جتني

عشقتها من قلب ميس ومحروم
وتركتها يـوم انهـا عاندتنـي

نار تشب بداخل القلب بسمـوم
حاولت اطفي ضوها واحرقتني

دنيا ثقيلة كلها هموم بهمـوم
كني حملت جبالها فوق متنـي

مشكووووووووووووووور

مشكور على الموضوع

» الشاعر : فهد الديحاني ؛؛عيشت ضنك؛؛
» نبذة عن الشاعر الكبير نزار قباني
» نبذة عن الشاعر الكبير نزار قباني
» قصيد الشاعر ناصر الفراعنة ناقتي يا ناقتي